Puisi
Lesag Lesug
olih Luh Arik Sariadi
Alas ingih punika puisi
sane ngendahang sarwi reraos
makudang kudang kruna
mayuta yuta warah lan wacana
wenten tetanduran cengik
rikala irage ngempok muncukne
wenten medengkik
rikala irage ngabas carangne
wenten sane ngawada
rikala irage nugel bongkolne
"Tuh...tuah amonto bisan i manusa?"
raris irage kemaruk nekaang
mesin gergaji lan bolduser
"lesag lepug alase, tuah amonto geginan i manusa?"
raris i tetanduran pedih lan bangras
sami isin alase gedeg jengat
tuun i gajah lan i macan nguyak desa
tanah ambul-ambul embid
yeh ngelohgoh galak
madukan bendu sekadi i bodos
nangkeb lan nyanyutang i manusa
"lesag lesug alase, amonto walesan i manusa tekening i Taru?"
